Stała viadoma, dzie ŭsio ž vučyłasia kasmanaŭtka Maryna Vasileŭskaja
Paśla viartańnia z MKS kasmanaŭtka Maryna Vasileŭskaja paśpieła ŭžo atrymać niamała ŭznaharod i ŭšanavańniaŭ dy razdała mnostva intervju, adnak adzin fakt jaje bijahrafii ŭłady i prapahandysty ŭparta chavajuć: dzie mienavita atrymlivała vyšejšuju adukacyju navaśpiečanaja kasmanaŭtka i na kaho naohuł jana vučyłasia. Adkaz na hetaje pytańnie znajšło «Lusterka».
Maryna Vasileŭskaja na arbicie. Skrynšot z «Biełaruś 1»
Raniej «Naša Niva» ŭžo źviartała ŭvahu na vidavočnyja prabieły ŭ bijahrafii Vasileŭskaj. «Biełaj plamaj» byli 9 hadoŭ žyćcia biełaruski: paśla zakančeńnia škoły i da pačatku pracy ŭ «Biełavija». Dumałasia navat, što moža jana ŭvohule vyšejšaj adukacyi nie maje. Vyjaviłasia, adnak, što maje, ale heta nie taja VNU, dypłomam jakoj ciapier chvalacca.
Šukajučy kancy, žurnalist «Lusterka» źviarnuŭ uvahu, što 29 sakavika, znachodziačysia na borcie MKS, biełaruska mieła znosiny sa studentami hałoŭnaj VNU krainy. Na pytańnie, jak jaje adukacyja dapamahaje ŭ prafiesii, Maryna Vasileŭskaja adkazała, što adukacyja ŭ jaje vyšejšaja, a śpiecyjalnaść — mieniedžar-ekanamist, praŭda, nie ŭdakładniŭšy, jakuju mienavita VNU skončyła.
Fota Maryny Vasileŭskaj u školnym vypusknym albomie. Skrynšot videa ANT
Kab heta vyśvietlić, žurnalist «Lusterka» patelefanavaŭ u Ministerstva adukacyi. Supracoŭnica ŭpraŭleńnia vyšejšaj adukacyi z upeŭnienaściu skazała, što Maryna Vasileŭskaja dakładna vučyłasia ŭ adnym ź biełaruskich univiersitetaŭ, u «niejkaj pryvatnaj VNU, ale ja nie pamiataju, jakoj dakładna».
Na sajcie Ministerstva adukacyi ŭ śpisie pryvatnych VNU Biełarusi paznačana ŭsiaho vosiem ustanoŭ. U siami z hetych VNU ŭpeŭniena adkazali, što Vasileŭskaja nikoli nie ličyłasia siarod ichnich studentaŭ. A voś vośmy pryvatny ŭniviersitet sa śpisu Minadukacyi apynuŭsia ŭ stadyi likvidacyi. Heta Minski inavacyjny ŭniviersitet.
Sajt jaho ŭžo nie pracuje, ale, tym nie mienš, udałosia znajści zahad ab zaličeńni studentaŭ zavočnaj formy navučańnia za 2012 hod, padpisany rektaram MIU Mikałajem Sušaj 6 žniŭnia taho ž hoda. Pad numaram 18 na śpiecyjalnaści «mieniedžmient (infarmacyjny)» fakulteta ekanomiki tam značycca Vasileŭskaja Maryna Vitaljeŭna.
Ministerstva adukacyi śćviardžaje, što paśla zakančeńnia takoj śpiecyjalnaści vypuskniki atrymlivali kvalifikacyju «mieniedžar-ekanamist». Takuju ž, jak nazvała Vasileŭskaja, adkazvajučy na pytańnie studentki BDU.
Ci skončyła kasmanaŭtka hety ŭniviersitet, — dakładnaha paćviardžeńnia znajści nie ŭdałosia. Pakolki Vasileŭskaja skončyła škołu ŭ 2008 hodzie, nieviadoma, ci atrymlivała jana adukacyju dzieści jašče da 2012-ha.
Čamu ŭłady chavajuć, dzie vučyłasia Vasileŭskaja, dakładna nieviadoma, adnak možna vykazać zdahadku, što vobraz studentki-zavočnicy MIU nie viažacca z ujaŭleńniami ŭładaŭ pra čałavieka, hodnaha zvańnia Hieroja Biełarusi. I tamu što ŭłady parušyli svaje ž praviły.
Minski inavacyjny ŭniviersitet byŭ adnym ź pieršych pryvatnych VNU našaj krainy. Jon pačaŭ pracu ŭ 1991 hodzie. Jašče da padziej 2020 hoda hetaja navučalnaja ŭstanova atrymała słavu pratestnaj — u 2019 hodzie tam prajšoŭ strajk studentaŭ, jakija vystupali suprać niepraciahvańnia akredytacyi ich VNU.
U sakaviku 2020-ha MIU ŭsio ž udałosia atrymać nieabchodnyja dakumienty, ale pry hetym VNU pryjšłosia zakryć niekatoryja śpiecyjalnaści. Ale ŭ krasaviku 2022 hoda studenty MIU atrymali paviedamleńnie ab nieabchodnaści pieravodu ŭ inšyja adukacyjnyja ŭstanovy «ŭ suviazi z płanavanym u 2024 hodzie spynieńniem adukacyjnaj dziejnaści».
Pry hetym pytańnie ab tym, čamu Marynu Vasileŭskuju adabrali ŭ atrad kasmanaŭtaŭ, zastajecca adkrytym. U červieni 2023 hoda namieśnik načalnika ŭpraŭleńnia aerakaśmičnaj dziejnaści NAN Biełarusi Ivan Buča paviedamlaŭ pra patrabavańni da biełaruskich kasmanaŭtaŭ: «Vyšejšaja adukacyja pa napramkach «fizika», «matematyka», «bijałohija», «rakietna-kaśmičnaja technika». Śpiecyjalnaść «infarmacyjny mieniedžmient», vidavočna, u hety śpis nie ŭvachodzić.
Čytajcie taksama:
Marynu Vasileŭskuju ŭžo rychtujucca adlić u bronzie i hranicie
Kasmanaŭty padaryli Łukašenku hadzińnik. U im jość adna sumnaja asablivaść
